KAMPANYA BATOK RABIES PADAYONG GITUTOKAN SA CITY VET

By on September 9, 2015

August 11 –

Nunot sa programang pang-kahimsog sa kagamhanang lokal ning dakbayan ilawom sa liderato ni City Mayor Evelyn T. Uy, nagkalaing-laing mga programa usab ang hugtanong gipatuman sa dakbayan pinaagi na sa mga buhatan ilawom usab niini. Tipik sa mga programa sa kahimsog nga padayong gipatuman mao ang na- andan na ug nagapadayong libreng “anti-rabies vaccination” nga gipahigayon pinaagi na sa lokal nga buhatan sa City Veterinarian, ilawom sa pagdumala ni City Vet. Dr. Russell T. Ganub. Ning kasamtangan, subsob ang pagpahigayon ning nahisgotang kalihokan dinhi palibot sa atong mga kabaranggayan, nga maglambigit sa matag purok niini. Ning pagbalita, upat na ka mga barangay ang sunod-sunod nga gipahigayonan sa libreng anti-rabies vaccination nga mao ang mga barangay sa: Miputak, Galas, Olingan, ug karong umaabot Agosto 26, ning tuiga, didto na usab sa Barangay Lugdungan.

Sigun sa gipamahayag ni Dr. Ganub, nga samtang aduna pa’y mga anti-rabies vaccines nga gibatonan sa ilang buhatan, magapadayon gayud sila sa pagpahigayon ug mga pagpamakuna sa mga iro ug iring, dinhi palibot sa dakbayan, aron hingpit nilang mapakgang ang rabies, nunot usab sa gilantaw karon sa kasamtangang liderato nga makunhuran o kaha mawagtang ang kaso dinhi sa Dipolog, aron mamahimo kining “Rabies-Free City”, sa umaabot nga mga adlaw.

Kahibalo-an nga ang rabies mokaylap pinaagi sa pagpa-ak sa iro, Ilabi na kadtong mga layaw, busa aron masumpo kini, kon mahimo, mapabakunahan kini. Alayon ning maong kalamboan, hugtanon karong gi-awhagan ang tanang mgacnagbuhi ug iro sa paghimo sa ilang mga kaakohan ngadto sa ilang mga binuhi ug sa katilingban, isip mga responsible pet-owners, pinaagi sa pagsanong ning nasangpit nga kampanya batok sa rabies.(CIO-alb)

News

Your Comments

You must be logged in to post a review.



Follow Us



Newsletter