BUHATAN SA CITY AGRICULTURIST RESIPIYENTE SA DA GRANT

By on September 10, 2015

August 19

Bulahan na usab ang Dakbayan sa Dipolog tungod kay resipiyente na usab kini sa usa ka “funding grant” gikan sa Departamento sa Agrikultura (DA).

 Mao kini ang gipaghibalo ni Engr. Kerr Porlas, ang kasamtangang City Agriculturist sa Dipolog, atol sa pakighinabi niini human napadas-ug ang usa ka resolusyon sa Sangguniang Panlungsod nga naghatag ug otoridad kang Mayor Evelyn Uy nga mopirma sa usa ka kasabutan o Memorandum of Agreement tali sa Dept. of Agriculture may kalabot na sa maong funding grant.

 Sumala pa ni Engr. Porlas, mokabat sa P21.5 milyones ka pesos ang madawat sa Dipolog City alang sa kalambu-an niini sa programa sa agrikultura, diin P14.5 milyones niini nagagikan sa Bottoms Up Budgeting (BUB) sa tuig 2014 ug ang P7 milyones nagagikan sa BUB 2015. Dugang ni Engr. Porlas nga kini nga kwarta gamiton sa pagpamalit ug organic fertilizers; pagpalambo sa balut production ug pagpalit sa mga incubators; pagtukod sa green house sa Barangay Diwan ug Cogon; ug ang paghatag sa mga farm machineries sama sa hand tractors ug hand threshers ngadto sa atong lokal nga mga mag-uuma. Lakip usab nga gahinan niini nga pondo mao ang livestock dispersal sa mga kabaw, manok ug pato sa mga resipiyente sa kabarangayan ug ang dugang pag-abli ug pagtukod ug pagkonkreto sa farm-to-market roads, nga maoy gikinahanglan aron mapadali ang pagdala sa mga produkto gikan sa kabukiran nganhi dire sa kamerkaduhan sa dakbayan.

Gipahibalo usab ni Porlas nga gumikan sa pagpasa sa mga project proposals sa ilang Buhatan sa Agrikultura sa Dipolog ngadto sa nasudnong buhatan niini, nahatagan ug higayon ang dakbayan nga maapil sa mga proyekto sa DA. Dugang niini, mipasalig si Porlas nga magmakanunayun ang pagsumitir niya sa mga project proposals ngadto sa DA ug ubang nasudnong ahensiya nga adunay kalambigitan sa kalambuan sa sektor sa agrikultura aron ang atong dakbayan kanunay makasinati ug food security ning parte sa atong nasud. (CIO-prr)

News

Your Comments

You must be logged in to post a review.



Follow Us



Newsletter