BFAR MIGAHIN PONDO ALANG SA FISH SANCTUARY NING DAKBAYAN SA DIPOLOG

By on September 11, 2015

Dipolog City Seal                

Republic of the Philippines,  CITY OF DIPOLOG 

 DIPOLOG.COM

_______________________________________________________________________________

September 2- Duna’y mokabat sa P1.5 milyones ka pesos ang gi-alokar nga pondo gikan sa rehiyonal nga buhatan sa Bureau of Fisheries and Aquatic Resources (BFAR) RO-IX alang sa pagpa-establisar sa Marine Protected Area (Fish Sanctuary) diha sa Don’s Reef sa kadagatan ning dakbayan sa Dipolog.

     Kahibaloan nga usa ka resolusyon ang gipadas-og ni konsehal Praxides Rubia atol sa regular nga sesyon niadtong Setiyembre 1, 2015 nga maghatag ug pagtugot ni Mayor Evelyn T. Uy nga makapirma ug kasabutan tali sa BFAR, usa ka line agency sa Departamento sa Agrikultura pinaagi ni Regional Director Ahadulla S. Sajili, Al-Haj.

     Nasayran nga ang BFAR mao ang prinsipal nga ahensya sa gobiyerno nga duna’y katungod alang sa pagpalambo sa sektor sa panagat.   

      Nasayran usab nga ang National Government Agencies (NGAs) ug ang ubang stakeholders ang gikinahanglan nga makapadayon sa Millennium Development Goal nga mapakunhoran ang kapobrehon gikan sa 26.5 % sa tuig 2009 ngadto sa 16 % alang sa tuig 2015.

     Lakip nga nasayran nga ang usa sa mga istratehiya aron makab-ot ang katuyoan sa gobiyerno alang sa pagsulbad sa kapobrehon mao ang Bottom-Up-Budgetting (BUB), diin ang mga grassroots organizations ug ang komunidad ang mahilakip alang sa pagplano ug sa budgeting process.

     Dugang nasayran nga ang BFAR mao ang magpalambo sa kapabilidad sa LGU alang sa monitoring ug evaluation sa Fish Sanctuary pinaagi sa Participatory Coastal Resource Assessment (PCRA).

     Motabang usab ang BFAR alang sa aktuwal nga pagpa-establisar sa boundary markers sa fish sanctuary.

     Hatagan usab sa LGU ug katungod ang BFAR-IX alang sa pagbisita ug sa pag-monitor sa implementasyon sa nasangpit nga proyekto.  (CIO-MECC)

 

 

      O.K. for Release:            

                                                                                                                                                               LORENZO A. ASENERIO II

                INFORMATION OFFICER

 

News

Your Comments

You must be logged in to post a review.



Follow Us



Newsletter